Kung inaakalang mga softdrinks, kape, tsirtsirya lang ang mayroon sa vendo machine aba’y huli ka na sa balita. Dahil mayroon na ring water vendo machine na naglalabas ng malinis na tubig para sa mga nauuhaw. Ngunit hindi lamang ito basta ordinaryong vendo dahil ito mismo ang dumadalisay sa tubig sa pamamagitan ng mga aparatus na nakakabit sa loob ng vendo. Ang NASA Water Corporation ang pinakamalaking kumpanya at nangunguna sa larangan ng water vendo machine ang nagpalaganap nito sa bansa. Bukas sila sa mga nais mag-franchise na taga-Metro Manila.
Ang NASA ay may sampung taon nang nag-ooperate sa Pilipinas. Ayon kay Vilma Coronel, Marketing Head ng nasabing kumpanya, nagmula ang teknolohiyang ito sa Amerika. Nakita ito ng may-ari na isang Singaporian at naisip niyang dalhin ang ganitong sistema sa atin. Pumatok naman ito sa mga Pinoy at ngayon ay kalat na kalat na ang kanilang mga vendo. Karamihan sa mga ito ay ang kumpanya mismo ang nagpapatakbo. Katulad ng ibang vendo machine ay madali lang din itong gamitin. Magdadala lang ng lalagyan ang bibili. Maghulog lang ng barya saka pumindot, presto lalabas na ang tubig mula sa vendo. Ganun lang kasimple. Piso at sampung piso lang ang puwedeng ihulog. Kaya wala ng sukli-sukli.
Sinabi ni Coronel na direktang nakakabit sa kanilang vendo ang tubig galing man sa Nawasa o sa Maynilad. Kahit nga galing pa sa deep well ay uubra rin. Pitong bahagi diumano ang pagsalang pinagdadaan nito sa ilalim ng tinatawag na ‘reverse osmosis process’ kung saan ay 99.9% na namamatay ang bakterya sa tubig. Kaya’t makasisigurong malinis at ligtas ang tubig ang inilalabas ng kanilang vendo. Ayon pa kay Coronel, base sa isinagawang pag-aaral ng mga eksperto lumalabas na ang tubig na iniinom mula sa gripo ay hindi malinis kaya’t kinakailangan talaga itong salain. Pinapakuluan pa nga ng iba bago ito inumin. Ngunit pagdating sa kanila ay konting halaga lang at mayroon ka ng malinis na inumin. Mas matipid diumano ito kaysa naman maospital pa dahil sa pag-inom ng maruming tubig.
Para sa NASA ay hindi lamang ito basta isang negosyo. Naniniwala silang kalakip din ng kanilang ginagawa ang pagkakaroon ng social responsibility. Kung kaya’t inilalapit nila ang kanilang mga vendo sa komunidad para mapagkalooban ang mga ito ng malinis na inumin. Nakapuwesto ang kanilang mga vendo sa condominium, eskuwelahan, boarding house, subdibisyon at kung saan pang matataong lugar. Maliit lang ang puwesto ng kakainin ng vendo, nasa 1 meter x 1 meter.
Kung ikukumpara mo ang presyo ng water vendo sa mga water station ay ‘di hamak na mas mura sa kanila. Ang presyo ng tubig sa kanila ay 25 kada 5 galoon samantalang sa water station ay nasa 45 pesos kada 5 galoon. Maganda itong maging negosyo dahil wala itong pinipiling panahon. Ang malinis na tubig ay kasama sa pang-araw-araw na pangangailangan ng mga tao. Cash to cash basis ang bayad dahil nga hinuhulugan lang ng barya. Kahit walang tao na nagbabantay ay tumatakbo ang negosyo. ‘Di na rin kailangan pa ng imbentaryo. Bente kuwatro oras din itong nakabukas kaya’t mabilis ang return of investment. Walang puproblemahin sa machine dahil lingguhan kung ito ay puntahan ng mga taga-maintaince ng NASA.
May kasabihan na ang tubig ay buhay pero sa negosyong water vendo tiyak na mabubuhay!