Ngunit hindi lamang mga puro o may dugong Intsik ang dumadayo rito kundi kahit sino. Mapa-Pinoy man o banyagang nais maranasan ang kulturang Tsino. Palibhasa ay itinuturing ito bilang magandang destinasyon sa pusod ng Maynila. Bagama’t masikip ang kalye at usad-pagong ang mga sasakyan dahil na rin sa trapik.
Nagkalat ang samu’t saring restawran na naghahaain ng masasarap na pagkain na akma sa kung anumang budget ang mayroon ka. Sa mga restawran dito mo maaaring maranasan kung paano gumamit ng chopstick kung iyong nanaision. Isa sa pinakakilalang kainan na matatagpuan sa Ongpin ay ang President’s restawran. Mabenta ang kanilang hakao (shrimp dumplings), asadao siopao at iba pa. Bukod sa mga restawran, siyempre naglipana rin ang mga tindahan na nagbebenta ng masasarap na hopia, siopao, siomai at iba pa na sadyang natatangi ang timpla dahil orihinal ang sangkap na galing pang Tsina.
Kilala rin ang Ongpin dahil marami ang nagtitinda rito ng mga ginto na may matataas ang karat o yaong purong ginto. Marami sa mga bumibili rito ay ang mga mangingibig na nais alayan ang kanilang minamahal ng espesyal na alahas. Siyempre, mawawala ba naman ang mga herbal medicine rito? Pati na rin ang samu’t saring estatuwa na sumisimbolo sa kaunlaran katulad ng dragon. Diyata’t hindi lang sikmura ang mabubusog kundi pati na rin ang mga mata sa katitingin sa magagarbong estatwa.
Pagsapit naman ng Linggo ng gabi ay nagiging napakasayang lugar ng Ongpin dahil parang may pista. Paroo’t parito sa mga kalsada ang mga tao. Nagkakaroon din ng pagpapaputok kaya’t tuwang-tuwa ang mga tao na panoorin ang nagkikislapang mga ilaw o fireworks. Mistula tuloy na parang laging bagong taon sa lugar na ito tuwing araw ng Linggo.
Ayon sa kasaysayan ang Ongpin ay ipinangalan kay Don Roman Ongpin, isang negosyanteng Intsik na naging masugid na tagasuporta ng mga Katipunero pagdating sa pinansiyal noong taong 1896. May istorya pa nga na nang masunog ang kanyang bahay ay ibinigay niya ang kanyang insurance proceeds kay Gen. Emilio Aguinaldo. Kahit nang sakupin tayo ng mga Amerikano ay hindi tumigil si Don Ongpin sa pagtulong sa rebolusyon na naging sanhi ng kanyang pagkakulong. Dahil sa kanyang kabayanihan ay pinagawan siya ng estatwa sa tabi ng Binondo Church.
O, paano, tara pasyal na tayo sa Ongpin!