Ang pulot ay isa ring natural na pampatamis ngunit hindi alam ng karamihan na nagtataglay ito ng mga nutrisyonal at medikal na katangian.
Ang pulot ay nagtataglay ng mga sumusunod na minerals; potassium, magnesium, calcium, sodium, chloride, sulfur, iron, copper, iodine at zinc. Ang mga nasabing minerals ay nakapagbibigay ng sapat na sustansya sa ating katawan. Mayroon din itong choline, isang napakahalagang vitamin B na kailangan ng ating utak.
Ayon sa isang pag-aaral ng mga Swiss, ang pulot ay mayaman sa carbohydrates ngunit mababa sa glycemic index (GI). Ang mga pagkain na may mababang GI ay nakatutulong sa tamang pagdaloy ng dugo. Samantalang ang may mataas na GI ay makasasama lalo na sa mga diabetic.
Ang pulot ay mainam na panlaban sa mikrobyo at mga parasitiko. Ang kakayahan nito na mapigilan ang pagkalat ng maliliit na organismo ay napatunayan at naitala. Ang pulot ay nakatutulong din sa mabilis na paghilom ng mga sugat. Katunayan ay ginagamit ito ng ilang klinika upang ipanggamot sa ulcer at first, second and third degree burn. Napatunayan na mas mabilis itong makapagpahilom at hindi nagkakaroon ng impeksyon. Naobserbahan ni Dr. Peter Molan ng Waikato University sa New Zealand na mas epektibong panlunas ang pulot sa mga burn wounds kaysa sa mga anti-bacterial ointments na kalimitang ginagamit sa ospital.
Napatunayan din sa pag-aaral ni Dr. Ian Paul ng Penn State University na ang pulot ay mas mabisang gamot sa ubo lalo na sa mga bata kaysa sa epekto ng dextromethorpan na nabibili sa mga botika. Ang pulot ay nakatutulong din sa mga sanggol na mapataas ang kanilang timbang, mapataas ang bilang ng haemoglobin at nakapag-papaayos ng panunaw habang pinalalakas nito ang resistensya upang malabanan ang mga sakit.
Gayunpaman, hindi naman masama kung maparami ang pagkain ng pulot ngunit iwasan itong ibigay sa mga sanggol na wala pang isang taon upang makaiwas sa botulism poisoning. At ganun din sa mga taong may allergy sa pollen.
Ang kumbinasyon ng pulot at gatas ay mainam ng anti-aging hindi lamang sa balat kundi sa buong katawan. Maraming tao sa Roma, Egypt at India ay umiinom nito upang mapanatiling bata ang kanilang itsura. Ang pag-inom ng isang baso ng gatas na may pulot araw-araw ay nakapag-bibigay lakas at sigla sa katawan.