Kung mahilig o may interes ka sa science, maaari mong bisitahin ang Philippine Science Centrum na matatagpuan sa Marikina. Dahil bukod sa may matututunan ka na ay malilibang ka pa. Sino ang may sabi na boring ang science? Kahit nga ‘di ka mahilig sa siyensya ay maa-appreciate mo rin ang lugar na ito dahil interactive ang mga bagay na makikita rito.
Ilan lang sa mga highlights dito sa museum ay ang kanilang humangyro kung saan ay puwede mo itong sakyan at papaikutin ka. Sabi ng mga nakasubok na ay kakaiba ang pakiramdam habang sila ay iniikot, nakakahilo pero masaya. Para ka na ring sumakay sa feris wheel.
Magmimistula ka namang performer sa magic sa head on platter dahil kung titingnan ay parang pugot ang iyong ulo. Ang kailangan mo lang gawin ay sumuot ka sa parang cabinet at presto ulo na lang ang makikita sa iyo!
Tatayo naman ang buhok mo sa van de graff generator kapag hinawakan mo. Hindi dahil sa gagapangan ka ng takot kundi dahil sa enerhiyang taglay nito.
Meron ding distorted room sa museum. Kailangan ay dalawa ang taong papasok dito tapos sisilip ang nasa labas. Mamangha kayo sa makikita n’yo dahil ang isa ay maliit habang ang isa naman ay malaki. Kahit pantay naman ang sahig na tinatapakan sa loob ng kuwarto. Siyempre pa, dala rin ito ng ilusyon. Parang ‘yung magic mirror lang na kapag tinatapatan mo ay parang nahahati ang iyong katawan. Magic ba? Hindi ah, bunga ito ng science.
Ibang klase rin naman ang iba pang kuwarto sa loob ng museum. Meron dito na kapag hinawakan mo ang dingding ay maiiwan ang iyong anino. Akala pa naman natin na kahit kailan ay hindi hihiwalay sa atin ang anino natin. Tapos sa isa namang kuwarto, magkakaroon ng kulay ang iyong anino.
Kung kuryente ang pag-uusapan, meron din tungkol n’yan sa museum na ito. Makakakita ka rito ng buhay na kuryente as in ‘yung kuryente na hindi nakabalot sa wire. Siyempre, para itong apoy na kikislap-kislap. ‘Yun bang parang na nakikita natin sa mga nagwi-welding. Meron din dito na tinatawag na finger tingler. Dito kailangan ay may mga kasama ka tapos maghawak-hawak lang kayo ng mga kamay. Kapag pinindot na ang makina ay makakaramdam kayo ng ground ng kuryente. Pero don’t worry, ‘di naman masakit dahil mahina lang.
Bukod sa mga nabanggit ay marami pa kayong makikita sa loob ng museum. Nagkakahalaga lang ng 130 ang entrance fee kaya’t ‘di mabigat sa bulsa. Minsan ay nagkakaroon din ng science show dito kaya’t maganda talaga itong puntahan. Bukas din ito para sa mga school activities at corporate events, mga training at seminar na may kinalaman sa science.