Nakakita ka na ba ng magagandang miniatures? Kung hindi pa, bisitahin mo ang Museum of Miniatures na matatagpuan sa bayan ng Marikina. Mamamangha ka sa mga koleksyon na makikita mo rito dahil ang galing ng pagkakagawa. Para kasing totoo ang mga item dito, na kapag piniktyuran mo nang malapitan ay ‘di mo aakalaing miniature lamang ang mga ito. Nasa anim na libong items ang naka-display dito na miniatures. Aba’y talaga namang napakarami kaya’t magsasawa ang iyong mga mata sa katitingin.
Ang mga miniature na nakadisplay sa museum ay bahagi ng koleksyon ng miniature artist nang namayapa ng si Aleli Vengua. Karamihan sa mga ito ay siya mismo ang gumawa. Ang nakabibilib ay gawa sa scrap materials ang mga miniature. Kumbaga, ang mga materyales na ginamit dito ay makikita lang sa mga bagay na ginagamit natin sa araw-araw; mapa-ito man ay kahoy, plastic, aluminum, tela at salamin.Kung hindi nga sasabihin ng tour guide ay hindi mo maiisip na gawa lang ang mga ito sa scrap materials dahil na rin sa ganda ng pagkakagawa. Detalyado ang pagkakaukit pati na rin ang kulay ng bawat item. Ilan lang sa mga miniature na narito ay bahay o kuwarto na may iba’t ibang tema at iba pa
Maiisip mo, ilang oras kaya ang ginugol ng artist para makabuo lang ng isang obra. Marahil ay bumibilang ito, hindi lang araw kundi ilang linggo at maaaring buwan pa nga. Depende na rin sa dami ng detalye na kinakailangan ng isang obra. Kung mas marami, malamang na mas matagal. Bibilib ka sa tiyaga at dedikasyon ni Aleli at sa mga gaya niyang miniature artist. Kung ang malalaking obra ay mahirap nang gawin, ito pa kayang mga bagay na pagkaliliit lang na kamukhang-kamukha nang pinaggayahan? Bukod sa talento, aba’y kinakailangan din dito ang talas ng mata para makita ang ginagawa mo.
Ang Museum of Miniatures ay matatagpuan sa 2nd level, E-com Building Riverbanks Center. Nagkakahalaga lang ng 75 pesos ang entrance fee rito. Bukod sa museum na ito ay kasama mo na ring makikita ang Spirit of Bethlehem Museum na karugtong lang nito.