Ano nga ba ang higit na mahalaga, edukasyon ba o kayamanan? Kung tutuusin ay pareho lang naman itong mahalaga dahil ‘di mo puwedeng paghiwalayin sa isa’t isa. Pero sa ating mga Pinoy, gaano man kahirap ang isang pamilya, laging nating naririnig na pinapahalagahan natin ang pag-aaral. Di ba’t sinasabi ng mga magulang sa kanilang mga anak na mag-aral silang mabuti dahil tanging edukasyon lamang ang kanilang maipapamana? Ang ilan nga ay iginagapang pa ang pag-aaral sa mga anak dahil ayaw nilang matulad ang mga ito sa kanila na mangmang o walang pinag-aralan.
Pero tanggapin man natin at hindi at mahalaga ang pagkakaroon ng kayamanan bagama’t kaya mo naman itong kamtan kung mayroon kang edukasyon. Siyempre, ang ating utak ang lilikha kung paano natin mapapaganda ang ating buhay. Madalas nating marinig na kapag mayroon kang pinag-aralan ay malayo ang iyong mararating. Tama ito pero hindi rin ito palaging totoo. Depende pa rin ito kung ano ang iyong nagging propesyon pagkatapos mong mag-aral. Kung ikaw ba ay naging duktor, enhinyero, aboguda at kung ano ang propesyon na may matataas na sahod. Mas maganda kung naging isa kang bigtime na negosyante. Talagang masasabi mo na malayo ang narating mo sa buhay dahil umangat nang husto ang iyyong buhay. Marami rin namang nakapagtapos ng pag-aaral, ‘yun nga lang ay naging empleyado at sumasahod lang ng minimum.
Pero paano ka makakapag-aral kung kapos ka naman sa kayamanan? Kaya nga maraming talino ang nasasayang dahil lamang sa wala silang pera. Marahil ay may mga kilala tayo na matatalino pero nasayang lang dahil walang-wala talaga sa buhay. Kaya nga ang iba ay nagsisikap na makakuha ng scholarship at ang iba naman ay mapapalad dahil mayroong tumutulong sa kanila sa pag-aaral. Puwedeng mayroon silang sponsor o ‘di-kaya’y may kaanak na mas nakakaangat sa buhay ang tumutulong sa kanila. Pero paano kung wala, eh ‘di wala na?
Sa kabilang banda naman, kaawa-awa ang mga taong mayroong kayamanan pero kapos naman sa talino? Paano nangyari ‘yun? Sila ‘yung mga taong napamanahan lang ng kanilang mga magulang ng kayamanan. Pero hindi naman marunong humawak ng pera kaya’t ang nangyayari ay nauubos din ang mga ito. Maihahalintulad sila sa ilang nanalo sa lotto, nang manalo ay hindi alam kung paano papalaguin ang kanilang pera. Kaya’t sa halip na i-invest, ang ginawa ay gastos doon, gastos ditto. Sa huli ay walang natira sa kanila, maliban sa bahay na kanilang nabili. Ang iba nga ay naibenta pa ang bahay dahil imbes na pakinabangan ang premyo sa lotto ay namulubi pa. Ang suma total, balik sa dating buhay.